國泰早前宣佈大裁員，引起軒然大波。國泰高層指因為公司架構需要重組，以致要裁減六百多名員工，係二十年黎最大型一次！今次其實已經係國泰今年內第二次炒人，不禁令人對大企業前景產生問號 － 到底係大企業度做仲能唔能夠保障收入隱定？
其實單單今年內，匯豐銀行就已經係全球向二萬五千個員工開刀，香港分支亦都有一百二十個位員工遭央。香港迪士尼今年四月亦首次出現大型裁員，刪減左100個職位。而裁員潮更加係全球其他國家一浪接一浪：美國著名體育傳媒ESPN,快餐業巨頭McDonald′s同可口可樂都相繼炒人！
係大企業運作模式底下，當年度報表出現赤字，銷售表現下滑，員工就無可避免成為開源節流首個目標。
今時今日，大企業同鐵飯碗已經唔再係等號。相反，Startup係香港續漸抬頭。今年年度矽谷銀行報告就提到，tech startup對人材需求係呢四年內最高，十個startup老細有九個都請緊人 ！
咁到底係startup度做有咩好？Jobable歸納左三個startup令人垂菁的原因：
第一：工作環境好
同d同學出黎gathering，大多數聽到既苦水都係覺得公司階級觀念太重，規矩同潛規則水蛇春咁長。老細交低個task加句：「你同我死掂佢」就算。唔識做問多兩句，就比人話無腦。遇上憝居老細，都只可以say yes，如果唔係就係冇大冇細，就算做到薯片曾咁高職位，當住老細面都要講句 ”You always agree with your boss, no question about that!”
有讀哲學既朋友分析過，年青人點解咁難搵到一份滿意既工？因為四年大學一直都係訓練你要獨立自主，有批判思考 － 但係出黎打工，老細最想就係員工聽聽話話，安份守己；同大學生一直灌輸你既觀念完全背道而馳，咁又點會開心呢？
Startup老細大多數都係頂唔順呢種企業文化，先至出黎自己搞壇野。所以以上述情況係startup絕少出現。以我本身工作的地方為例：open office setting，CEO都冇自己房，intern可以直接同老細反映意見，初黎報到o既職場小薯對住經驗老到嘅senior亦都唔需要卑躬屈膝。開會果陣有咩妙想天開idea完全唔怕講，老細係真係會聽。
除此之外，lunchtime成班同事嘻嘻哈哈嗌pizza，放工一齊嘆啤酒，著短褲同涼鞋翻工係startup亦屬等閒事，根本唔會有人理。有同事甚至話對左部電腦成日做到個人吽吽哣哣，走左去玩陣足球機。老細見到都唔會有意見，因為佢清楚明白，員工有健康嘅mental health對公司長遠發展先係最好。
第二： 彈性翻工時間
對於係企業白領黎講，秩序佔左佢地生活好大部份：朝九晚五，等到十二點就落canteen排隊食lunch，隔一陣就望下個鐘等夠鐘放工。當然，工作模式並冇對錯，只有適唔適合。有d人係希望安安定定，秩序井然嘅生活對於佢地黎講係最舒適，因而比較推祟對企業文化。不過如果呢個情況你聽落都覺得枯燥的話，咁你係時候考慮下探索startup 文化。
大多數startup都接受每個人有自己最有效率的工作節奏：有人朝早頭腦最清醒，有人可能半夜三更個腦先轉得最快，好正常，因為每個人都係獨立個體。係效率同成果優先的startup文化中，只要你妥善地完成被委派既工作，你幾點翻工幾點收工都係其次，管理模式相比大企業人性化好多。
第三：職位自由流動，唔會死咕咕
有朋友剛剛畢業入左間startup度做Customer Service（客戶服務），做做下對Account Management（客戶管理）產生興趣，於是走左去同個manager傾幾句，個manager好快就幫佢安排左幾個shadowing sessions更加了解呢個職位；而家已經轉左去第個部門做Account Executive（客戶主任）。
其中一個係startup做野嘅好處就係公司架構平面，人力資源流動可以更加自由同有彈性。大多數startup老細對於有志將自己興趣融入工作嘅員工都好支持，因為比員工係工作上做自己鍾意做野可以將公司運作效益提高。換句說話講，只要你平時做野有擔帶，又夠主動，想試d咩老細通常都會好肯比機會。
其實係startup做野既人，好多時都會跨專業工作。平時做開graphic design（平面設計）o既人可以管埋social media，做sales o既同事可能幫公司event做下mc。每一日翻工都可以接觸到唔同o既挑戰，學到新o既技能。
相反係大企業度做，其實同工廠既設定好類似，一個人負責一樣單一既工作，週而復始，好容易就會覺得悶。對於呢d打工仔黎講，星期一永遠都係最大敵人。